‘पाटा आई डी’ कार्यक्रम:पाटा नेपालद्वारा विभिन्न व्यक्तित्व सम्मानित
ट्राभल बिज न्यूज —
काठमाडौं – प्यासिफिक एसिया ट्राभल एसोसिएसन (पाटा) नेपाल च्याप्टरले यसवर्ष देखि पाटा आइडी ( Inauguration Day) कार्यक्रम मनाउने क्रम शुरु गरेको छ /
प्रत्येक वर्ष विश्व पर्यटन दिवसको पूर्वसन्ध्यामा पर्ने संस्थाको औपचारिक स्थापना दिवस ( सेप्टेम्बर २६, १९७५) लाई एक उत्सवको रुपमा मनाउने क्रममा पाटा आइडी नामक नया कार्यक्रम शुरु गरिएको हो / पाटा नेपालले यो कार्यक्रम बार्षिक कार्यक्रमको रुपमा मनाउने निर्णय गरेको छ /
विश्व पर्यटन दिवस २०२२ को मूल नारा “रिथिङ्किङ टुरिजम“ लाई आत्मसात् गर्दै संस्थाको ४७ औँ बार्षिकोत्सव मनाउन आयोजित पाटा आईडी कार्यक्रम एक संजाल बिस्तार, नेटवर्किंग, अन्तरक्रिया, सम्मान तथा पहिचान, आकर्षक लक्की ड्र पुरस्कार र मनोरंजन कार्यक्रमको रुपमा सोमबार सम्पन्न भयो /
पाटा आईडी र विश्व पर्यटन दिवस समारोहको औपचारिक कार्यक्रममा, पाटा नेपाल च्याप्टरले आगामी वर्ष २०२३ जुन ६ देखि ९ सम्म आयोजना गर्ने चौथो हिमालयन ट्राभल मार्टको प्रोमो भिडियो सार्वजनिक गरेको थियो ।
पाटा नेपाल च्याप्टरले सन् २०१७ देखि २०१९ सम्म वार्षिक रुपमा हिमालयन ट्राभल मार्ट का तीन संस्करणहरू आयोजना गरेको थियो, जुन विश्वव्यापी महामारीपश्चात पछिल्लो समयमा आयोजना हुनसकेको छैन ।
नेपालको पर्यटन व्यवसाय तथा गन्तब्य प्रवर्द्धनका लागि प्रमुख अन्तर्राष्ट्रिय ट्राभल ट्रेड मेलाको रुपमा स्थापित हिमालयन ट्राभल मार्टमा विश्वव्यापी क्रेताहरू, हिमालयन बिक्रेताहरू, ट्राभल ब्लगरहरू, प्रभावकारहरू, राष्ट्रिय र अन्तर्राष्ट्रिय सञ्चारमाध्यमहरू, ट्राभल उद्योग व्यवसायीहरू र विश्वका विभिन्न राष्ट्रका प्रतिनिधिहरूको उल्लेखनीय सहभागिता रहदै आएको छ / मार्ट ब्यापार आदान–प्रदान ,सम्बन्ध संञ्जाल विस्तार, ज्ञान तथा सिप आदान–प्रदान गर्ने एक मञ्चका साथै लोकप्रिय बी–टु–बी कार्यक्रम हो ।
पाटा आइडी कार्यक्रम मनाउने क्रममा आयोजित समारोहमा पाटाले पर्यटनसंग सम्बन्धित व्यक्तित्व र संस्थाहरूलाई सम्मान गरेको छ ।
पाटा नेपाल च्याप्टरका संस्थापक कोषाध्यक्ष तथा अग्रज पर्यटन व्यवसायी ज्योति लाल खन्नाले संस्थालाई प्रदान गर्नु भएको अमूल्य योगदान र नेपाली पर्यटन क्षेत्रको प्रवर्द्धन र विकासका लागि ४५ वर्षभन्दा बढी समय सम्म निर्वाह गर्नु भएको उल्लेखनीय भूमिकाको उच्च सम्मान र कदर स्वरुप स्व. खन्नालाई ‘पाटा लाइफटाइम अचिभमेन्ट अवार्ड २०२२’ प्रदान गरिएको छ ।
यस्तै पर्यटन बोर्डका पूर्व कार्यकारी प्रमुख दीपकराज जोशीलाई नेपाली पर्यटन क्षेत्रको प्रवर्द्धन, दिगो विकास र पुनरुत्थानमा योगदानको कदर स्वरुप ’पाटा पर्सनालिटी अफ द इयर २०२१’ प्रदान गरिएको छ भने बुद्ध एयरका प्रबन्ध निर्देशक वीरेन्द्र बहादुर बस्नेतलाई ‘पाटा टुरिजम ट्रेलब्लेजर अवार्ड २०२२ ‘बाट सम्मानित गरिएको छ।
पाटाले आफ्ना सदस्य शैक्षिक संस्थाहरुमध्ये पाटा नेपाल स्टुडेन्ट च्याप्टरको उद्देश्य र भावना अनुरुप उत्कृष्ठ कृयाकलापहरु गरेकोमा प्रशंसा गर्दै ग्लोबल कलेज इन्टरनेशनल लाई ‘वेष्ट स्टुडेन्ट च्याप्टर अफ द इयर २०२२ ‘अवार्ड प्रदान गरेको छ ।
कार्यक्रमका प्रमुख वक्ता दीपकराज जोशीले नेपालको सन्दर्भमा “पर्यटनमा पुनर्विचार” सम्बन्धी आफ्नो धारणा राख्दै नेपाली पर्यटनको सम्भावनालाई थप उजागर गर्न तथा पर्यटनबाट अधिकतम लाभ लिन परम्परागत स्रोतबजार कायम गर्दै एशियाक्षेत्र बाट माग बढाउनुपर्ने, डिजिटल क्षमता र सेवाहरू अभिबृद्धी गर्नुपर्ने, गुणस्तरीय लगानीलाई प्रोत्साहन गर्दै पर्यटकीय स्थलहरूको विविधीकरण गर्नुपर्ने, पर्यटन उत्पादन-गन्तब्यहरूको प्रभावकारी व्यवस्थापन र सेवा मानकीकरण गरिनुपर्ने, दक्ष जनशक्ति मानव संसाधन विकासमा जोड दिनुपर्ने, पर्यटकहरूको संख्या भन्दापनि गुणस्तर एवं विशेष स्रोतबजार लक्षित मार्केटिङ रणनीतिहरू अवलम्बन गर्नुपर्ने र स्थानीय, क्षेत्रीय, राष्ट्रिय र अन्तर्राष्ट्रिय स्तरमा पर्यटन साझेदारी र सहयोगलाई बढावा दिनुपर्ने जस्ता सात प्रमुख बिषयमा काम गर्नुपर्ने आवश्यकता औल्याउनु भयो /
कार्यक्रममा विशिष्ट अतिथि वक्ता रवीन्द्रराज पाण्डेले पाटासँगको आफ्नो संलग्नता र पाटा नेपाल च्याप्टरले सन् १९८० र ९० को दशकमा नेपाली पर्यटन क्षेत्रको प्रवर्धन र विकासका लागि गरेका अग्रगामी पहलका अनुभव उल्लेख गर्दै पाटा नेपाल च्याप्टरद्वारा हाल भैरेहेका प्रवर्द्धनात्मक प्रयास , पहल र संस्थाको औपचारिक स्थापना दिवश समारोहलाई हरेक वर्ष पाटा आईडी का रूपमा मनाउने अवधारणाको सराहना गर्नुभयो ।
पाटा नेपाल च्याप्टरका अध्यक्ष विभूति चन्द ठाकुरले आफ्नो स्वागत मन्तव्यमा पर्यटन उद्योगको दिगो विकास र पुनरुत्थानका लागि स्वास्थ्य सुरक्षा, पर्यटकहरुको सुरक्षा, गन्तब्य तथा पर्यटन उपजहरुको सरसफाइ र सेवाको मापदण्ड स्तरोन्नतिमा सबै निजी तथा सरकारी सरोकारवाला निकायहरु एकजुट भएर लाग्नुपर्नेमा जोड दिनुभयो ।
११ असोज २०७९
तस्विर : पाटा नेपाल
