कोभिड – १९ को महामारीबाट अति प्रभावित पर्यटन उद्योगको पुनरुत्थानका लागि तत्काल कदम चाल्न माग
ट्राभल बिज न्यूज —–
काठमाडौँ – पर्यटनसँग सम्बद्ध प्रमुख संघ संस्थाहरुले देशभरी पर्यटकीय गन्तव्यहरुमा अग्रपंक्तिमा रही खटिएका पर्यटन सेवा प्रदायक व्यवसायी तथा सम्बन्धित क्षेत्रका कामदार, कर्मचारीहरु एवम् सरोकारवालाहरुलाई कोभिड–१९ विरुद्धको खोप लगाउने व्यवस्था ३० दिनभित्र हुनुपर्ने तथा सम्पूर्ण नेपालीहरुलाई कोभिडका विरुद्ध खोप उपलब्ध गराई विश्व पर्यटन क्षेत्रमा विश्वसनीय वातावरणको लागि पहल गर्दै सम्पूर्ण पर्यटकीय क्षेत्रहरु खुल्ला गर्नु पर्ने माग अघि सारेका छन् /
कोभिडविरुद्धको खोपको मात्रा पूरा गरी नेपाल आउने पर्यटकहरुलाई क्वारेन्टिन बस्न नपर्ने तथा त्रिभुवन अन्तर्राष्ट्रिय विमानस्थल र अन्य प्रवेश बिन्दुहरुमा पीसीआर टेष्टको व्यवस्था गरी पोजिटिभले मात्र क्वारेन्टिन बस्नु पर्ने व्यवस्था गर्नु पर्ने माग पनि संघ संस्थाहरुले गरेका छन् /
एउटा पर्यटकको आगमनले फरक–फरक दक्षता र क्षेत्रका १२ जना जनशक्ति प्रत्यक्ष वा अप्रत्यक्ष रुपमा लाभान्वित हुने यथार्थता विद्यमान भएतापनि सरकारद्वारा पर्यटन क्षेत्रलाई साँघुरो दायरा भित्र लिनु अति कम प्राथमिकताको उद्योगको रुपमा हेरिनु र पर्यटन सम्बद्ध संघसंस्थाहरुले पर्यटन क्षेत्रको हक–हित र दीगो विकासका लागि उठाइएका माग एवम् सुझावहरु पटक–पटक यथोचित सम्बोधन नहुनु दुर्भाग्य एवम् विडम्बनाको बिषय बनेको छ , विज्ञप्तिमा उल्लेख छ /
पर्यटन क्षेत्र पुनःसुचारु तथा पुनरुत्थानका लागि तत्काल सम्बोधन गरिनुपर्ने मागहरुमा आर्थिक बर्ष २०७८/ ७९ का बजेटमा घोषणा गरिएका पर्यटनसंग सम्बन्धित नीति तथा कार्यक्रमहरु लागू गर्ने , नेपालको सबै स्रोत बजारहरुमा भिसा जारी गर्ने निकायहरु नरहेकाले पर्यटकहरुको यात्रा सहजीकरण र नेपाल घुम्न प्रेरित गर्नका लागि अनलाईन भिसा (ई–भिजा) सेवा प्रणाली मार्फत सहजरुपमा “भिसा अन–अराइभल” व्यवस्था लागु गर्नुका साथै फ्रि भिसाको कायांन्वय न अबिलम्ब शुरु गरी पर्यटकीय सेवा प्रदायक होटल एजेन्टहरु मार्फत मात्रै भ्रमण गर्न पाउनु पर्ने व्यवस्था लागू गर्नु पर्ने , स्वास्थ्य सुरक्षा प्रोटोकल कार्यान्वयन प्रभावकारी बनाउन देशव्यापी तालिम तथा अनुगमन संयन्त्रको व्यवस्था गरिनुपर्ने , सीसीएमसीमा पर्यटन सम्बद्ध मूख्य छाता–संगठनका अध्यक्षहरुमध्येबाट प्रतिनिधित्व हुनुपर्ने समेत छन् /
यस्तै पर्यटक सवारी सम्बन्धमा तुरुन्तै जारी हुन लागेको इम्ब्रोस्ट नम्बर प्लेट पर्यटक सवारीसाधनमा हाल भइरहेको हरियो प्लेट जस्तै छुट्टै किसिमको पहिचान हुने गरी व्यवस्था हुनुपर्ने , पर्यटक सवारीहरु सहज रुपमा मुलुकका विभिन्न प्रदेशहरुमा विना रोकटोक थप आर्थिक भार विना झण्झटरहित आवागमन गर्न पाउनु पर्ने , ट्रेकिङ्ग, टुर, राफ्टिंग लगायत अन्य साहसिक कम्पनीहरुको निम्नतम अधिकृत पुजी २५ लाख बराबरको बिना धितो शुन्य प्रतिसत ब्याज दरमा ऋणको ब्यवस्था गर्ने र यस्तो ऋणको अधिकतम अवधि ५ बर्ष कायम गर्ने माग पनि छ /
कोभिड–१९ का कारणले पर्यटन यातायात संचालन नभएको अवस्थामा सवारी कर पूर्ण रुपले छुट गर्नुका साथै आ.व. २०७६/७७ र २०७७/७८ को जरिवाना पूर्ण छुट गर्नु पर्ने , पर्यटकीय यातायात व्यवसायीहरुको लागि ३% मा कर्जा उपलब्ध गराउनु पर्ने साथै सवारी साधन जांचपास तथा प्रदुषण परिक्षण शीर्षकमा लाग्ने कर तथा जरिवाना एक बर्षको लागि सतप्रतिशत मिनाहा गर्नु पर्ने , सवारी साधन संचालन नरहेको अवधिलाई शुन्य समय गणना गरी सवारी साधनको विमा वापतको रकमलाई कम्तिमा १ बर्षको लागि मिनाहा गर्नु पर्ने माग पनि गरिएको छ /
कोभिड – १९ को महामारीबाट अति प्रभावित पर्यटन उद्योगको पुनरुत्थानका लागि कदम चाल्नुपर्ने माग राख्दै संयुक्त विज्ञप्ति जारी गर्ने संस्थाहरुमा – नेपाल एसोसियसन अफ टूर एण्ड ट्राभल एजेन्ट्स , होटल संघ नेपाल , ट्रेकिंग एजेन्सिज एसोसियसन नेपाल , नेपाल पर्वतारोहण संघ , नेपाल एसोसियसन अफ राफ्टिंग एजेन्सिज , नेपाल एसोसियसन अफ टूर अपरेटर्स , टुरिस्ट बस एसोसियसन नेपाल , सोसाईटी अफ ट्राभल एण्ड टूर अपरेटर्स , हिमालय उद्धार संघ , एक्सपीडिसन अपरेटर्स एसोसियसन नेपाल , नेपाल पर्यटक यातायात व्यवसायी संघ तथा पाटा नेपाल च्याप्टर छन् /
साउन २६ , २०७८
तस्विर : ट्राभल बिज न्यूज
